Col 2 | MED | STEP | Enim pileing nᵾmp ik ei mel nᵾnt. Ei na ndi, enim kᵾn, Leiyoresiya kona wamp mormin kᵾⱡ kᵾn, wote na kᵾni nakᵾndᵾrmᵾn wamp mbᵾ pora nga tᵾp rapᵾndᵾp kongun mindil tᵾp et.

Colossians 2

Mondpa Pili Orunga Ronduⱡ Pangga, Ik Kol Mbᵾ Tᵾk Mana Ndᵾi

1 Enim pileing nᵾmp ik ei mel nᵾnt. Ei na ndi, enim kᵾn, Leiyoresiya kona wamp mormin kᵾⱡ kᵾn, wote na kᵾni nakᵾndᵾrmᵾn wamp mbᵾ pora nga tᵾp rapᵾndᵾp kongun mindil tᵾp et. 2 Na kongun uⱡ kᵾⱡ et ei, enim nga mundmong orunga etᵾp ndoimp rᵾndamba wamp numan ngui uⱡ ila molk kᵾn, wote kapⱡa en enim nga mondpa pili orunga etᵾk ronduⱡ munding ei nga, numan kun kai ei, kandᵾk tᵾk pileing. I etᵾk molk kᵾn, Got nga ik puⱡ mo ropa tetᵾm ei nga puⱡ wu Kraist morum ei, pilik mbi nduing. 3 Got nga pilpa kungᵾndi ronduⱡ mo ropa tetᵾm mbᵾ, Kraist kᵾn peka ropa tetᵾm. 4 Wamp ti ndi, enim ik kol ropa ngumba, ik kunt kan iti nᵾtangga nᵾmp kᵾn, enim kundᵾp nᵾnt. 5 Na enim kᵾn muⱡi nambᵾr. Ei wote, na nga numan ei, enim kᵾn tenda punum ei ndi, enim kᵾn mor. Enim Kraist kᵾn ronduⱡ mundᵾk, mondᵾk pilik kongun kupa etᵾk mormin ei nga, na kandᵾp kai pilip numan ngunt.

Kraist Kᵾn Rᵾmp Nduk Molk, Numan Kont Ei Tᵾmin

6 Enim Kraist Jisas enim nga Nuim ei nᵾk rukᵾr tᵾtᵾng. Akup ei kᵾn, i ku etᵾk, Kraist kᵾn rup rok muⱡᵾi! 7 Nde na ti, mᵾi ila pilkan ngumba etᵾm ni mel, Jisas kᵾn pilkan nguk, enim nga mul orunga, Jisas tᵾk manga paka rumᵾnt randᵾk itᵾi! Enim Rᵾnang Ik Kai ei ndi, mbo endᵾtmᵾn ni mel, uⱡ mbᵾ etᵾk, enim nga mondpa pili orunga ronduⱡ pangga, numan kai pilik, Got kᵾn angge nᵾi!

8 Enim pilik tᵾk mendᵾk muⱡᵾi! Wamp mat ndi, Kraist nga ik mat nᵾndᵾnmᵾn nᵾk, ik nuwᵾ roldᵾnga mat nᵾk, enim ik kol rok nguk, tᵾk tiki pundi nᵾpᵾndeing. Wamp i etpa mbᵾ, mᵾi kona uⱡ kurpa mbᵾ etᵾk, wamp kalk tᵾk, etmin ik mbᵾ mint nᵾtmin.

9 Got nga numan pilpa uⱡ etᵾm mbᵾ pora, Kraist nga kᵾng ila peka ropa tetᵾm. 10 Wamp nga uⱡ etmin ronduⱡ mbᵾ kᵾn, mel nant kanmᵾn mbᵾ nga pora, Kraist ei, wu peng mumuk ei morum. Ei nga, enim Kraist kᵾn molk numan kont ila peka rangga muⱡᵾi! 11 Kraist kᵾn kunda molk kᵾn, kᵾng kupti uⱡ kupa ei kandᵾk tᵾtᵾng. Ei wamp nga etmin uⱡ ei mon! Kraist koⱡpa kont mba, tᵾn nga nit mbᵾ tinga ndurum. Uⱡ ei, kᵾng kupti uⱡ kupa ei. 12 Enim nu tᵾtᵾng ei kᵾn, Kraist kᵾn kunda on etᵾng. Got nga ronduⱡ ei ndi, Kraist on kona ila ⱡoporpa oⱡa mundrum nᵾk, mondᵾk pilik nu tᵾtᵾng. Uⱡ ila nga, enim Kraist kᵾn kunda, on kona ila ⱡoprᵾk oⱡa morung.

13 Unt, enim nga min orunga, koⱡpa pora ndurum. Nambuⱡ emel, uⱡ kit mbᵾ nga minal etᵾng. Wote uⱡ ti, enim wamp rᵾⱡaip elpa kᵾⱡ, mi ik ila rukᵾr muⱡi nambᵾrmᵾn. Wote akup, Got tᵾn nga uⱡ kit mbᵾ pora tinga ndupa, enim etpa mepa mba, Kraist kᵾn kup inditim. 14 Ei nga mi ik kᵾⱡ ndi, tᵾn tᵾpa mana ndurum ni, Got ndi, tᵾpa munduⱡnga, Jisas Kraist nde peta ila pitim. Uⱡ ni ndi, Got ndi, tᵾn nga uⱡ kit mbᵾ kᵾmp kᵾm tᵾpa, mundpa pora ndurum. 15 Kraist nde peta ila pitim uⱡ ei ndi, wu peng mumuk na, wu nuim na mbᵾ nga ronduⱡ mbᵾ, tᵾpa mana ndupa, elim mbi oⱡa orunga titim.

16 Ei nga, wamp ti ndi, enim kᵾn, ik poⱡpa, nu rᵾng na, ui wingti na, mowi kor na, uⱡ mbᵾ nga mi pendpa uⱡ ti iti nᵾtangga! 17 Uⱡ mbᵾ, wote pemba ei nga, akup to rondᵾp kanmᵾn, wote uⱡ mbᵾ nga mel kupa ei, wu Kraist. 18 Wamp ti ndi, enim nga ruk ting ila moⱡpa, ur kump et nimba, muna elim mana ndup, anggelo mbᵾ nga atinga ror nimba uⱡ mat em mbᵾ ndi, enim tᵾpa mana ndui nᵾndangga! Wamp i etpa mbᵾ rukᵾr orunga, wamp nga mbo numan ei ndi, peka roⱡnga, kᵾng ei nga peng ei, wu Kraist morum ei ambuⱡpa, gi ndui nandpa nᵾtᵾm. Kraist ei ndi moⱡpa, kᵾng ei pᵾkᵾ nokundpa rᵾng ropa elinga, kᵾng na, ombil pilkan na mbᵾ, Got nga numan ila pᵾtᵾm ei mel ou etᵾm.

20 Ya mᵾi kona numan kit ngurum uⱡ mbila, enim Kraist kᵾn kolk ping mel puⱡᵾngina, enim etpa titim. Ei nga, nambuⱡ emel, ya mᵾi kona nga numan kit mbᵾ, kandᵾk tᵾk mormin? Nambuⱡ emel, mᵾi kona nga mi ik mat mim etᵾk, ‘Mel ei ᵾmbᵾⱡi nᵾmbᵾⱡi, mel ei nui nᵾni, muna mel ei, minda ndui nᵾndi nᵾk enmin uⱡ mbᵾ nga teng ndui nᵾndᵾi?’ 22 Uⱡ mbᵾ, wamp nga ik mim etᵾk mbo endᵾk etmin. Uⱡ mbᵾ, pora nimba, wei ai etᵾm. 23 Ei kupa, mi ik kᵾⱡ pilpᵾn, tᵾn nga orunga mana ndupᵾn, kᵾng orunga mindil tᵾpᵾn, mbi paka kupa rondpᵾn itᵾmin. Wote, ik ei kupa nᵾmp pᵾnmᵾn. Ei wote, mi ik kᵾⱡ ndi, tᵾn nga numan kit unt nga kandᵾp tᵾtmᵾn uⱡ mbᵾ, kapⱡa tᵾpa mana ndui nandᵾmba.